Die voorgestelde besproeiingskema in die Buffeljagtsvallei word tans druk bespreek, skryf M.E. MELCK.
Die vertoë van die plaaslike boerevereniging, wat die noodsaaklikheid van ’n standhoudende watervoorraad besef, is tot dusver met welslae bekroon deurdat die departement van besproeiing ná ’n uitgebreide opname tans besig is met die beraming van die koste van ’n opgaardam en betonkanale waaruit die hele gebied besproei kan word.
Net onderkant die Zuurbraakvallei sal ’n grondwal gewerp word oor ’n vallei, bekend as Grootvlei. Hierdie wal sal oortollige water wat tans in die winter na die see vloei, opdam.
