Eers as ’n mens moet betaal om ’n Switserse boer op sy plaas te kan besoek, besef jy hoe toegewy aan hul taak boere in dié skilderagtige land werklik is en hoe kosbaar hulle hul tyd ag.
Landbouweekblad se destydse redakteur, PIENAAR SMIT, het verslag gedoen oor wat hy op die plaas van ’n vooraanstaande teler van Bruin Switser-beeste aangetref het. ’n Boer betaal om sy plaas te besoek? Jy maak seker ’n grap!
Dit is waarskynlik wat u sal sê as ek u vertel dat ek dié dag vir die eerste keer in my lewe my hand in my sak moes steek om te betaal vir die eer om ’n boer op sy plaas te gaan sien.
