’n Boer van die KwaZulu-Natalse Middelland, wat al meer as een keer deur grondbesetting in die gesig gestaar is, het wéér die trauma beleef toe dieselfde grondhuurders gedreig het om die plaas te beset.
Volgens me. Sandy la Marque, hoof uitvoerende beampte van Kwanalu, is dié organisasie tevrede met die wyse waarop die boer en die polisie opgetree het om die situasie te ontlont.
“Hoewel dit nie die eerste maal is dat ons met grondbesetting in KZN te doen kry nie, maan ons deurgaans ons lede om hul veiligheid te verbeter en pro-aktief op te tree. Die propaganda voor die verkiesing gaan van alle kante af kom en gevolgtrekkings moenie lukraak gemaak word sonder die korrekte inligting nie. Slegs deur ingeligte pro-aktiewe werksaamhede, goeie kommunikasie onder mekaar en ’n uitstekende werkverhouding met die SA Polisiediens, kan ons ons gemeenskappe beveilig,” verduidelik La Marque.
Moet beeste oor hele plaas jaag
Mnr. Chris Fourie, AfriForum se koördineerder in KwaZulu-Natal, verduidelik dat die Msomi-gesin aanhoudend die grensdrade knip op mnr. Peter Train se plaas, Gala Farms, 40 km noord-wes van Pietermaritzburg. “Die Msomi-gesin het weidingsregte op 4 ha grond van Train se plaas en om op hierdie stuk grond te kom, moet die gesin hul beeste deur die hele Gala Farm jaag,” verduidelik Fourie. Dit is hierdie reëling, waaroor reeds in 2007 in ’n uitspraak van die Grondeisehof beslis is, wat al dié ontevredenheid en misverstande veroorsaak.
Nadat die plaas se grensdrade weer Vrydag geknip is sodat die Msomi-gesin hul beeste kan laat wei, het Train ’n klag van saakbeskadiging by die Howick-polisiekantoor teen Msomi en sy twee seuns gelê. Die polisie het Saterdag die drie mans in hegtenis geneem en Sondag is hulle op borg vrygelaat. Sondagoggend was Msomi en sy een seun, vergesel deur nóg vier mans, met knopkieries en een selfs gewapen met ’n byl, weer terug op Gala Farms.
Volgens Fourie het Train toe die polisie ontbied, waarna die polisie die ses mans in hegtenis geneem het. Fourie het bevestig dat al ses mans weer Maandag op borgtog vrygelaat is, maar dat Train, met die hulp van AfriForum, ’n saak van ongemagtigde betreding aanhangig maak teen die vier mans wat Msomi vergesel het.
Die Departement van Landelike Ontwikkeling en Grondhervorming, asook regsverteenwoordiging, is reeds ’n geruime tyd onsuksesvol by hierdie saak betrokke om toe te sien dat die dispuut so gou as moontlik opgelos word. Die grondeis vir die weiding op Gala Farms duur dus voort.
