Oor die afgelope twee dekades het die meeste Suid-Afrikaanse landboukoöperasies van die oorspronklike koöperatiewe ondernemingsvorm in openbare maatskappye omgeskakel.
Die Villiersdorp Koöperasie (Vilko) in die Wes-Kaap is vandag een van slegs ’n handjie vol landboukoöperasies wat hoofsaaklik tot voordeel van lede – boere – funksioneer.
“By ons word diens steeds voorop gestel, selfs voor wins. Wanneer die boustene van diens aan ons lede reg is, volg winsgewendheid vanself,” sê mnr. Ben Klindt, wat al 19 jaar as hoofbestuurder aan die stuur van sake staan.
