Die statistieke bewys dat een uit elke een mens sal sterf, soos ’n dominee eendag gesê het. En as jy oud word, maar nie noodwendig amptelik aftree nie en steeds aanhou werk, sal daar ’n dag kom dat jy maar jou stewels moet ophang, want die lyf en/of die kop kan ingee.
Verder gebeur daar in ons lewe van tyd tot tyd minder goeie dinge, soos dat jy familielede aan die dood afstaan. Of ’n famililid kan ongeskik raak, en dan moet jy na só ’n geliefde omsien.
Dit is die werklikhede van die lewe, en jy moet daarop voorbereid wees om die beste van elke situasie te kan maak. Om paraat te wees ten opsigte van die risiko’s in jou geldsake, onderneming, boerdery, bates en laste, beleggings, sekuriteit, ensovoort, verg kundigheid en kennis. Vir die gewone mens is dit soms ’n berg wat oorgesteek moet word.
