“Die aanwysing van Woodlands Dairy as die FFF se nuwe topverskaffer van die jaar toon sy langtermynverbintenis tot volhoubaarheid reg oor die verskaffingsketting, van die weiding tot in die produksie-aanleg,” sê mnr. Kobus Pienaar, Woolworts se FFF-kenner.
Mnr. Lex Gutsche, uitvoerende hoof van Woodlands Diary, sê hulle is dankbaar oor die erkenning van die FFF-program, aangesien volhoubaarheid een van hulle kernwaardes is.
“Ons het die melkery in 1995 begin met ’n verbintenis daartoe om ’n besigheid te bou wat die regte ding doen. Ons heg waarde aan geleenthede vir deurlopende verbetering, wat gehelp het met die wetenskapgebaseerde benadering van die program.”
Woodlands Dairy se melk kom van 69 melkboere, met die meeste wat melk hoofsaaklik van weidings in die Tsitsikamma produseer.
Volgens Woolworths het die melkery oor die jare heen nou saam met melkboere gewerk om die omgewingsimpak van hul plase te verbeter. Op fabrieksvlak het die maatskappy energieverbruik aangepak danksy biomassastookketels en bykomende sonpanele, sy eie afvalwaterbestuur en infrastruktuur om reënwater te oes om waterverbruik en waterbesoedeling te verminder.
Die melkery ondersteun verskeie gemeenskapsopheffingsprojekte wat toegespits is op die verbetering van gesondheid en skoolopleiding in die Kouga-area.Dié maatskappy verwerk nagenoeg 900 000 liter melk per dag, met tot 1,4 miljoen liter melk wat per dag tydens die spitstyd van die seisoen verwerk moet word.
Die melkery verskaf tans tien verskillende langlewemelkprodukte aan Woolworths, onder meer vir die kleinhandelgroep se handelsmerk.
Die FFF-program is begin met die samewerking van Woolworths se verskaffers van vars groente en vrugte, maar is mettertyd uitgebrei om ook wyn, langlewemelk, vars sap en bevrore groente in te sluit.
“Die program meet ’n reeks impakte op die plaas en op fabrieksvlak, en sluit ook datapunte in wat verband hou met grondlewe, waterverbruikdoeltreffendheid, gewasbeskerming, energiegebruik, besproeiingsdoeltreffendheid, waterlekkasies en afvalwaterbestuur.”
Woodlands Dairy het ’n gradering van 81 uit 100 gekry in die afgelope jaar se oudit wat deur Enviroscientific se assessors behartig is. Die gemiddelde gradering vir verskaffers is 64,8.
“Woodlands Dairy word geprys daarvoor dat hy verwagtings oortref wanneer dit kom by sy FFF-graderingsverbetering, gemeenskapsbetrokkenheid, die persentasie van die totale voetspoor wat beoordeel is, en sy akkuraatheid, detail en die vroegtydige inhandiging van aksieplanne.”
Woolworths se FFF-program is in 2009 begin. Meer as 480 primêre en sekondêre verskaffers word beoordeel.
