Een van Suid-Afrika se grootste pluimveeprodusente, Astral Foods, het tydens die eerste kwartaal van sy 2012/’13-boekjaar, rekord lae bedryfswinste aangeteken. Dié tydperk sluit die feestyd en feestydverkope in.
Luidens ’n berig op Fin24.com het die bedryfswins vir dié tydperk, vergeleke met die ooreenstemmende tyd verlede die vorige jaar met 60% gedaal. Dit is volgens die maatskappy sy swakste handelsprestasie sedert dit op die JSE gelys is. Mnr. Chris Schutte, hoof uitvoerende beampte, het volgens ’n verklaring gesê hulle het reeds verlede jaar aangedui dat hul swak handelstoestande in die eerste helfte van die 2012/’13-boekjaar verwag.
Schutte sê die handelstoestande tydens die eerste kwartaal was erger as wat verwag is: “Aanduidings is dat die tweede kwartaal se prestasie baie erger as dié van die eerste kwartaal sal wees en gevolglik sal Astral se resultate vir die ses maande tot en met 31 Maart 2013 ernstig beïnvloed word.”
Faktore
Een van die faktore wat Astral se pluimvee-afdeling tydens die eerste kwartaal van die boekjaar die ergste beïnvloed het, sluit die hoë prys van mielies en sojabone in. Dié twee kommoditeite het rekordhoë pryse aangeteken, en dié hoë pryse sal na verwagting ook gedurende die tweede kwartaal voorkom.
Rekordhoë invoer van pluimvee van Brasilië en Europa en ’n verbruikersomgewing wat onder druk verkeer, het die maatskappy se vermoë om hoë produksiekoste die hoof te bied, benadeel. Die invoer het tot ’n hoë vlak van pluimvee plaaslik gelei, wat die maatskappy se marge onder druk geplaas het.
Intussen duur Astral Feed en die maatskappy se afdelings in Afrika se goeie prestasies voort. Die maatskappy verwag dat sy wesensverdienste per aandeel vir die eerste en tweede kwartaal van die boekjaar onderskeidelik met tussen 45% en 65% en 75% en 95% sal daal vergeleke met die eerste ses maande van die 2011/’12-boekjaar.
Stakings
Die maatskappy se werksaamhede in die Wes-Kaap is ook geraak deur die gewelddadige betogings wat die provinsie geteister het. Tussen November 2012 en Januarie 2013 het die maatskappy een sterfte aangeteken, terwyl drie van sy pluimvee-aanlegte aan die brand gesteek is. Sowat 65 000 hoenders is tydens die voorvalle doodgebrand, en ses plase is ook gevandaliseer.
Die skade wat die maatskappy weens die stakings gely het, word op sowat R35 miljoen bereken. Die maatskappy waarsku dat die skade aan pluimveebates tot produksiebeperkings kan lei, wat uiteindelik werksverliese kan beteken.
Bron: Fin24.com
