Die koei kry beslis die swaarste tydens laktasie. Haar melkproduksie bereik ’n hoogtepunt sowat 2,5 maande ná kalf, met ander woorde haar voedingsbehoeftes is dan die grootste. Dit is waarom daar in ’n driefase-lekprogram na ’n produksielek beweeg word sodra koeie begin kalf (vir sowat 60-90 dae na gelang van weidingstoestande).
Ek het ’n paar lammers wat ek deur die nag in die kraal sit en daagliks voer. Deur die dag gaan die lammers uit na ’n meerjarige raaigrasweiding. Ek weeg my lammers elke Donderdag. Woensdagaand kom die lammers in kraal toe voor hulle vroeg die volgende oggend geweeg word. Hul gewig is baie wisselvallig. Die een week weeg die lam 38 kg, die week daarna 41 kg, dan 39 kg, dan 38 kg en daarna 42 kg. Waarom gebeur dit en hoe moet ek te werk gaan?
Wat jy hier beleef, is ’n wesenlike probleem. Die wisselvalligheid kan hoofsaaklik aan pensvulling toegeskryf word, al onttrek jy voer en water. My voorstel is om die lammers liewer elke 14 dae te weeg. Dit sal die variasie laat afneem en is ook minder ontwrigtend vir die lammers. Verder moet jy die toename per tydperk (7 dae of 14 dae) evalueer, asook oor die hele tydperk.
