Hierdie uitsonderlike tweeling is op mnr. Lood Goosen en sy seun, Lood jr., se plaas Blombosfontein naby Jongensfontein in die Suid-Kaap gebore. Goosen sê volgens wat hy kon vasstel, is daar nog net drie ander gevalle in Suid-Afrika bekend waar buffels tweelingkalwers gehad het. Die versies se pa het besonderse groot horings van 130 duim, soos gemeet volgens Safari Club International (SCI) se standaarde.
Goosen boer sedert 2002 met buffels en het sy kudde in 2011 van Musina in Limpopo na die Suid-Kaap verskuif. Daar is tans 60 buffels in die kudde. Volgens Goosen was hy self nie op die plaas toe ’n koei met haar twee pas gebore kalwers een oggend heeltemal onverwags by die hanteringskraal naby die plaasopstal opdaag nie. Sy vrou, Alet, het die koei met die tweeling egter gesien en Goosen onmiddellik gebel. Later het sy ook gesien hoe die koei met net die een kalf weer koers vat die veld in. Dié koei en haar kalf het weer by die kudde aangesluit.
Koei aanvaar buffelkalf
Volgens Goosen kom die buffels selde naby die plaasopstal en was dit gevolglik heeltemal uitsonderlik dat die koei en haar kalwers wél daar aangedoen het. Toe hy op die plaas kom, het hulle die tweede kalf in die kraal gekry waar die koei dit gelos het. Hy het dadelik biesmelk by ’n melkery gaan kry en dit met ’n bottel vir die kalf wat agtergebly het, gevoer. Hy het ook ’n Jerseykoei aangeskaf wat self pas gekalf het en die koei het die buffelkalf summier aanvaar. “Dit is te oulik om te sien hoe die buffel- en die Jersey-kalf saam-saam aan die Jersey-koei suip. Dit is ook interessant om te sien dat die beeskalf (soos alle beeskalwers) van die kante af suip, terwyl die buffelkalf (soos alle buffelkalwers) net van agter af, tussen die koei se agterbene deur, suip. Buffels doen dit só sodat die kalwers steeds kan suip terwyl die kudde trek en die koeie met kalwers nie die prooi van roofdiere, soos leeus, word nie,” vertel Goosen.
Dr. Cindy Harper van die fakulteit veeartsenykunde van die Universiteit van Pretoria (UP) sê meerlinge by die groter diersoorte, soos beeste en perde, kom nie algemeen voor nie. Dit is sekerlik ook nie altyd maklik om tweelingkalwers in ’n buffelkudde te bevestig nie, hoewel die ouerskap met DNS-toetse bevestig kan word.
Prof. Henk Bertschinger, ’n emeritus-professor van dieselfde fakulteit en ’n reproduksie-spesialis, sê hy het in sy loopbaan wél al gehoor van tweelingkalwers by buffels, maar dit is beslis ’n skaars verskynsel.
