Die fees is ’n viering van een van Suid-Afrikaanse boere se trotse uitvoerprodukte. Feesgangers kry die kans om meer te leer oor die wonders van wol en waarom dit so ’n merkwaardige produk is.
Die fees plaas veral ook klem op volhoubare en herlewingspraktyke in die landbou, besighede en modes.
Die fees word van Vrydag 24 Junie tot Sondag 26 Junie op Middelburg en omliggende plase aangebied. Dit begin met die opening van die Sir Herbert Baker-roete, wat ’n toer insluit na verskeie geboue wat deur een van Suid-Afrika se bekendste argitekte ontwerp is.
Handwerkentoesiaste kry die geleentheid om deel te neem aan verskeie werksessies, waar hulle kan leer hoe om wol te kleur, kreatiewe brei en brei vir beginners, weef en die maak van vilt van wol.
Vrydagaand word ’n skuurdans op die plaas Rusoord aangebied.
Feesgangers kan die Saterdag onder meer uitsien na ’n besprekingsessie, met sprekers soos mnre. Dawie Roodt van die Efficient Group, Roland Kroon, wat luisteraars sal toespreek oor herlewingsgrondbestuur, Jackie May, ’n inhoudskepper vir volhoubare modes, Jacques le Roux, OVK se hoofbestuurder vir wol en bokhaar, Leon de Beer, hoofbestuurder van die Nasionale Wolkwekersvereniging en Stefan Gerber, stigter van Gerber and Co, wat wolprodukte van sy eie boerdery in die Namakwaland vervaardig.
Diegene wat kans sien vir die koue van die Karoo, kan deelneem aan die eerste Karoo-winterwedloop en -bergfietsry by Beskuitfontein Roetes. Drawwers kan kies ’n stap- of drafroete van 5 km of 10 km, met bergfietsryers wat die 25 km-roete kan aandurf.
Dr. Loraine van den Berg, karoobossiekenner van die Grootfontein-landbou-ontwikkelingsinstituut, sal deelnemers langs die roete meer vertel oor die ekologie van die omgewing en waarom dit geskik is vir wolproduksie.
Die Karoowintermark sal op die Dwarsvlei-gasteplaas aangebied word met verskeie vervaardigers wat hul wolprodukte sal ten toon stel, asook ander plaaslike produkte.
Besprekings moet gemaak word vir die geleenthede. Besoek die webwerf by https://www.karoowinterwoolfestival.com/ vir nog inligting of die Facebookblad van Middelburg Karoo Toerisme by https://www.facebook.com/Middelburg.Karoo.
