Luidens Bokhaar Suid-Afrika se verslag het die mark op die tweede veiling wat op 6 en 7 Maart aangebied is, in geheel met 4% toegeneem om op ’n gemiddelde prys van R379,70/kg te sluit.
“Die aanbod het bestaan uit goeie gehalte haar, met individuele skeersels wat uitstekende resultate behaal het. Kopers het aktief meegeding om goeie gehalte bokhaar op aanbod, wat die huidige vraag na bokhaar weerspieël.”
Die styging in pryse word toegeskryf aan die huidige goeie vraag, tesame met die swakker rand. Die beste pryse is vir RMS-gesertifiseerde haar betaal, wat 86% van die aanbod uitgemaak het.
Die gemiddelde markaanwyser het op die eerste veiling vir die jaar, wat op 14 Februarie plaasgevind het, met 10% toegeneem teenoor die laaste veiling van die winterseisoen aan die einde van 2022.
Volgens die House of Fibre-verslag was die tweede veiling besonder groot met 192 104 kg wat aangebied is, wat omtrent dubbel so groot was as die vorige veiling. Die vraag was groter vir die 25 mikron- en fyner bokhaar, en 31 mikron- en sterker bokhaar. Daarteenoor het die kategorie vir die 26-30 mikron-bokhaar gesukkel om dieselfde vlakke as op die eerste veiling vol te hou.
Die hoogste prys op die veilings was R800,30/kg wat vir ’n baal 23 mikron-kleinbokkiehaar betaal is.
Die volgende veiling word op 20 Maart aangebied.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
