Landbouskoue word nie geraak deur ’n beslissing van die Grondwethof dat artikels 2 en 3 van die Wet op Vertoningsdiere ongrondwetlik is nie, het me. Marcelle Meredith van die Nasionale Dierebeskermingsvereniging (NDBV) by navraag aan Landbouweekblad gesê.
Skoue waar beeste, perde of kleinvee boordeel word en wat betrekking het op die landbou, is uitgesluit van die bepalings vir diere wat vertonings vir vermaaklikheid lewer. Perde en honde wat vir vermaakliheidsvertonings gebruik word, is egter ook onderhewig aan die bepalings, het sy gesê. Dit sluit rodeo’s en “Western riding” in wat die afgelope tyd baie gewild geraak het.
Die Grondwethof het ’n bevel van die Noord-Gautengse Hooggeregshof bekragtig dat permitte wat daarvoor uitgereik word, ’n administratiewe aangeleentheid is. Landdroste sal dit dus nie langer mag uitreik nie. Die NDBV het ook aangevoer landdroste het nie die nodige kundigheid om dit uit te reik nie.
Die hof het die Departement van Landbou, Bosbou en Visserye ses maande tyd gegee om die betrokke wetgewing reg te stel en ’n tydelike komitee daargestel om intussen permitaansoeke te hanteer. Die komitee sal saamgestel word uit twee verteenwoordigers van die NDBV en die Departement onderskeidelik en een verteenwoordiger van die Suid-Afrikaanse Veterinêre Raad.
