Altesaam 433 stuks wild sal tydens Africa Game Bomas se derde wildveiling naby Mariental in Namibië te koop wees. Dit is die grootste veiling van sy soort in dié buurland, wat ook gewild onder Suid-Afrikaanse en Angolese kopers is.
Dr. Johann Archer, tandarts van Windhoek en mede-eienaar, sê belangstellendes kontak hulle tans van wyd en syd. Die veiling lok jaarliks sowat 400 mense, en Archer en mnr. Paul Malan, mede-eienaar en direkteur van Shoprite-Checkers in Namibië, verwag op 27 Julie 2013 weer soveel besoekers.
Archer sê hulle vorige twee veilings se omset was R10,4 miljoen en R15,2 miljoen onderskeidelik. “Omset is baie moeilik om vooruit te bereken, maar ons is hoopvol om ’n omset van R16 miljoen vanjaar te behaal.”
Hoop leer bidDié twee sakemanne, wat saam op Karasburg grootgeword het, het ’n wildtrofee-jagplaas in 2008 gekoop. Die ekonomiese afswaai in dié jaar, het ’n ommeswaai rakende dié wildboerdery genoodsaak. “Nood leer bid en toe die jag nie werk nie, het ons besluit om veilings aan te bied,” vertel Archer.
Die bomas waar die veilings aangebied word, bestaan uit 32 hokke, en tydens ’n veiling word nog 20 tydelike hokke opgeslaan. Verskeie eksotiese wildspesies is gewoonlik ook by die veilings te koop.
Die diere wat dié jaar beskikbaar is, sluit ’n goue swartwitpensbul, goue gemsbokke, 14 swartwitpense en ’n paar wit renosterbulle en -koeie in.
Lees meer oor Africa Game Bomas en Africa Safari Lodge en die twee sakemanne se planne vir hulle wildboerdery en die –bedryf in Namibië op bl. 30 van Landbouweekblad van 19 Julie 2013.
