Die vleisbedryf is een van Suid-Afrika se bedrywe wat gereeld in die media onder skoot kom aangaande die kwessie van klimaatsverandering. Dít was een van die redes waarom ’n werksessie onlangs deur Rooivleisnavorsing en Ontwikkeling Suid-Afrika (RMRDSA) aangebied is.
RMRDSA sê die bedryf erken die bydrae van 4% tot 8% van die veebedryf tot die produksie van kweekhuisgasse en klimaatsverandering. Tydens die sessie is die verskeie onderwerpe waaroor navorsing reeds bestaan, bespreek, asook dié kwessies waaroor navorsing nodig is. Luidens ’n verklaring sal verskeie rolspelers saamwerk om dié navorsing moontlik te maak.
Faktore wat navorsing raak
Vier faktore is uitgewys wat belangrik geag word rakende navorsing. Die eerste is oor die voedingswaarde van vleis, suiwel en hul produkte en hoe ’n laer inname hiervan die mens se gesondheid sal beïnvloed. Tweedens moet die multidimensionele aard van die veebedryf in die oog gehou word, veral aangaande voedsel, leer en vesel.
Moontlike aanpasbare reaksies om die kwesbaarheid van die opkomende sektor aangaande klimaatrisiko’s te verminder, is as ’n derde faktor uitgewys. Die vierde faktor is die vordering wat die bedryf reeds gemaak het in ’n poging om die kwessie aan te spreek.
Uitdagings by navorsing
Die uitdagings wat die bedryf deur middel van die navorsing aangespreek wil hê is:
- Die herstel van graslande.
- Veldbestuur en ondersteuningstelsels vir besluite.
- Verbeterde produk-werking.
- Aardverwarming en volhoubare veeproduksie.
- Die skeiding tussen voedsel en voedingsbehoeftes .
- Meetbare tegnieke vir kweekhuisgasse en die Suid-Afrikaanse veebedryf.
- Kweekhuisgasse, water en afvalbestuur.
- Die opkomende sektor.
- Voedselsekerheid.
Kontak RMRD SA by info@rmrdsa.co.za/publications@rmrdsa.co.za of besoek hulle webtuiste, www.RMRDSA.co.za vir meer inligting.
