’n Slag-agentskap en produksie van vee is twee gebiede waarin NWK Beperk sy bedrywighede wil uitbrei. Die groep het, ná jare se betrokkenheid in die graanbedryf, besluit om ook die veebedryf te betree.
Die maatskappy het onlangs die maatskappy Kalahari Beef, asook die handelsmerke Kalahari Beef en Kalahari Grass Fed Beef, gekoop. Tradisioneel het die groep se bedrywighede op die verskaffing van boerdery-insette vir graanverbouing, en opberging en bemarking in Noordwes gefokus.
Luidens ’n verklaring sê die groep verskeie beesboere en kettingwinkels toon groot belangstelling in dié konsep en produk.
Produksie-protokol
Die maatskappy is van plan om ’n slag-agentskap in Kalahari Beef te bedryf. Dit sal fokus op aankope van markklaar grasgeproduseerde beeste, wat volgens ’n spesifieke protokol grootgemaak en gevoer is. Die protokol is gebaseer op die hoogste standaarde wat deur verbruikers en kettingwinkels voorgeskryf word.
“Die diere word dan geslag en aan vooraf geselekteerde opnemers verkoop vir verwerking en verkope aan verbruikers, wat 'n voorkeur vir hierdie natuurlik geproduseerde produk het,” lui die verklaring.
Die aanbod van diere wat volgens die protokol geproduseer word, is relatief laag. NWK Bpk het derhalwe besluit om deur middel van hulle volfiliaal, NWK Boerdery, self by beesproduksie betrokke te raak. Hulle is van plan om kalwers te koop en te kontrakteer aan voorafgekeurde beesprodusente, wat die kalwers sal grootmaak totdat hulle markklaar is.
Die eerste slagtings word vir volgende maand beplan, en dan sal die eerste kalwers ook by gekeurde produsente geplaas word.
