Só sê dr. Jasper Coetzee, ’n onafhanklike skaapvoedingspesialis. Hy het op die jaarlikse boeredag van Tomi’s Abattior naby Gouda gepraat. Meer as 400 boere en belangstellendes het dit bygewoon. Coetzee het gesê presisieboerdery is die toekoms van skaapboerdery. Die enigste maniere om wins met skaapboerdery te verhoog, is om produksiekoste so laag moontlik te hou, skaapproduksie (kilogram vleis per hektaar geproduseer) te verhoog, die kudde se teelpotensiaal te verhoog en om in pas te bly met die jongste tegnologie en dit toe te pas. “Tegnologie ontwikkel baie vinnig. Binne vyf jaar gaan elke skaap ’n oorplaatjie kan kry wat presies bepaal watter soort voiding en hoeveel dit moet ontvang.
Verhoogde lampersentasie
“Presisievoeding beteken om die regte kos op die regte tyd en vir die regte tydsduur aan 'n skaap te gee om sy volle teelpotensiaal te ontsluit,” het Coetzee gesê. “Prikkelvoeding is uiters belangrik vir ooie om hul lampersentasie te laat klim. Prikkelvoeding moet ook aan lammers gegee word. Proewe het bewys dat lammers tot 50 dae vroeër gespeen kan word as prikkelvoeding gegee word.
“Vir elke rand wat jy aan prikkelvoeding bestee, kry jy tot R3 se waarde terug in jou sak,” het hy gesê. “As jy nie lammers op weiding met kruipvoeding afrond nie, bluf jy jouself. As geen afrondingsvoeding op weiding aan lammers gegee word nie, moet lammers tot 81 dae langer daarop loop om dieselfde kondisie te behaal.”
Coetzee het gesê boere moet hoogs vrugbare ooie selekteer. “Niemand het hulle nog bankrot gevoer in ’n seleksieprogram nie, maar talle boere is al bankrot omdat hulle nie genoeg gevoer het nie.” Met presisieskaapboerdery word elke ooi volgens haar gewig en behoefte gevoer. “As jy nie betyds aanpas nie, sal jou buurman jou plaas koop mits hy self betyds aangepas het,” het Coetzee gesê.
