Agri SA en die Nasionale Wolkwekersvereniging (NWKV) is uiters bekommerd oor die verbod se impak op die plaaslike wolbedryf aangesien 70% tot 80% van Suid-Afrika se skeersel, wat ’n jaarlikse waarde van R5 miljard het, gewoonlik na China uitgevoer word.
Sedert die verbod in April vanjaar ingestel is, het ’n beraamde R734 miljoen se woluitvoer na China verlore gegaan. Dit bring die lewensbestaan van die bedryf se 35 000 werkers, asook 4 500 seisoenale skeerders en wolhanteerders in gedrang.
Luidens ’n gesamentlike verklaring meen Agri SA en NWKV die verbod is ongegrond aangesien protokolle bestaan vir die opberging van wol vir ’n spesifieke tyd teen die vereiste minimum temperature soos bepaal deur die internasionale organisasie vir dieregesondheid (OIE).
“Daar is gedurende die uitbreking in 2019 oor dié maatreëls onderhandel om die onderbreking van handel in situasies soos die een wat tans ervaar word, te beperk. Alle Suid-Afrikaanse uitvoerpakhuise is by die Chinese owerhede geregistreer om behoorlike monitering en akkurate sertifisering te verseker. Verder, hoewel skape vatbaar vir bek-en-klouseer is, is geen uitbrekings in wolproduserende gebiede aangemeld nie en is geen kleinvee sover met bek-en-klouseer besmet nie.”
Ingryping deur ministers
Aangesien die eerste wolveiling
van die seisoen om die draai is, versoek die organisasies dat me. Thoko Didiza,
minister van landbou, grondhervorming en landelike ontwikkeling, en mnr.
Ebrahim Patel, minister van handel, nywerheid en mededinging, ingryp om die
bedryf se toegang tot die Chinese mark te verseker.
“Ons is veral bekommerd oor die opkomende en kommunale wolprodusente, aangesien die meeste van hul skeersels vir China bestem is. Meer as 40 000 kleinskaalse produsente bemark jaarliks naastenby 6 miljoen kg ter waarde van ’n beraamde R300 miljoen. Hierdie produsente en hul omliggende gemeenskappe sal weer in armoede verval as die Chinese mark vir Suid-Afrikaanse wol gesluit bly.”
Verskeie kommersiële wolprodusente herstel nog ná die lang droogte. As woluitvoer na China nie kan hervat nie, sal hulle moontlik nie oorleef nie. “Agri SA en NWKV kan net vertrou dat die Suid-Afrikaanse owerhede elke moontlike poging sal maak om hierdie kwessie uit die weg te ruim. Suid-Afrikaanse wol is veilig vir uitvoer en ons moet hierdie kwessie vinnig oplos ter wille van die lewensbestane wat in die spervuur is.”
