Boere wat veevoer meng vir hul eie diere, sal hul vermengingsgeriewe moet registreer as die voorgestelde Wetsontwerp op Misstowwe en Veevoer in sy huidige vorm aanvaar word.
Die Parlement het onlangs openbare verhore oor die wetsontwerp gehou.
Mnr. De Wet Boshoff, uitvoerende direkteur van die Vereniging van Veevoervervaardigers (Afma), sê Afma steun die beginsel van die lisensiëring van alle plekke waar kunsmis, voer, kos vir troeteldiere en voorafgemengde mengsels vervaardig, verpak, geëtiketteer of gemerk word as voer vir diere, wat bestem is om deur die mens gebruik te word.
Sal instansies beskerm
Dit sal opspoorbaarheid in die voedselketting en die regulering van veilige kunsmis en voedselproduksie verseker en die verbruiker beskerm.
Maar Afma stem nie saam met die klassifisering van iemand wat tuis voer meng nie. Hy meen die “tuismengers” kan nie as sodanig geklassifiseer word en kos in die waardeketting verkoop nie. Boshoff het voorgestel dat iemand wat voer by die huis meng, eerder omskryf word as enigeen wat voer vir diere in sy eie sorg meng en ook vir eie gebruik.
Dit moet insluit enigeen wat kunsmis self vir eie gebruik meng, maar wat nie in die menslike voedselketting beland nie. Dit sluit nie in iemand wat kunsmis of voer meng om te verkoop nie.
Sal aanleg moet registreer
Die Rooivleisbedryfsforum stem nie saam dat alle menggeriewe geregistreer moet word nie, want dit sal beteken dat die boer wat self voer meng, sy aanleg moet registreer.
Die forum sê sy ondervinding is dat dit ’n tydrowende en potensieel baie duur, indien nie onmoontlike, proses sal wees.
Boere en produsente wat hul eie voer meng, sal lang tye moet wag voor hulle geregistreer is en wettig kos op hul eie persele mag meng om hul vee mee te voer.
Die wetsontwerp sal waarskynlik ook in die onderskeie provinsies in die land bespreek word.
