Toe ons destyds die kleinhoewe gekoop het, wou ons meer selfvoorsienend wees. Dit is mos maar almal se droom, maar ons het gou besef ons sal die koste moet bestuur. Voor en gedurende covid-19 het mense al hoe meer daarin belang gestel om te weet waar hul vleis vandaan kom.
Naspeurbaarheid en die plaas-tot-bord-beginsel het belangriker geword. Dit is ook hoe ons verkies het om te koop en te eet. Vyf jaar gelede het ons met vyf sôe begin boer, en langer as ses maande gewag voor ons met hulle begin teel het.
’n Sandvelder-kruising. Ons doel was om te teel vir marmering en goeie vleis, maar ook ’n vark wat in die buitelug kan leef sonder om sonbrand op te doen. Sandvelders is natuurlike goeie moeders en hul snoete is effens korter, dus wei hulle beter.
