“Die hoofrede vir laer speenkalfpryse lê in die volgehoue druk waaronder verbruikers gebuk gaan. Hoewel die Paasnaweek histories tot meer aankope en gevolglike stygings lei, is die verbruiker ekonomies gesproke baie pap en ek weet nie of dit vinnig gaan verander nie,” sê mnr. Dewald Olivier, hoofbestuurder van Red Meat Industry Services (RMIS).
Paasnaweek was in die verlede ’n voorspeller tot beter rooivleispryse met verbruikers wat meer rooivleis vir die feestyd aankoop, maar dit blyk nie vanjaar die geval te wees nie.
Olivier meen dat die situasie ook nie gou gaan verander nie. “Wat het intussen verander en wat gaan nog verander om die situasie vir die verbruiker te verander? Dit is ’n ope vraag en die feit is dat met minder besteebare inkomste verbruikers ook nie gou hul aankope gaan vermeerder nie. Inteendeel, dit raak net erger vir die verbruiker.”
