Dit is soönotiese siektes wat ook ernstige gesondheidsrisiko’s vir mense inhou.
Dr. Ariena Shepherd, private veearts, het op die kongres van die Rooivleisprodusente-organisasie in KwaZulu-Natalse op Fordoun gesê dat Brucella abortus in beeskuddes op 19 plase in die provinsie se Middelland voorkom. Dit is nie net ’n probleem om hierdie siekte op ’n plaas uit te roei nie. Hoewel dit ’n beeskudde minstens 30% van sy kalweroes in slegs die eerste jaar van besmetting kan kos, kan dit ook potensieel langdurige gesondheidsimplikasies hê vir mense wat dit van besmette beeste opdoen.
“Een nageboorte van ’n besmette koei is genoeg om nog 1 000 koeie te besmet. Die doeltreffendste bekampingsmaatreël is om alle beeste behoorlik teen hierdie siekte in te ent. Die rooivleisbedryf werk daaraan om private maatskappye van die einde van die jaar af brucellose-entstowwe te laat vervaardig. Beesboere moet ten volle ingelig wees oor die voorkoming en bestuur van die verspreiding van brusellose,” het Shepherd gesê.
Sy het gewaarsku dat B. melitensis toenemend by bokke geïdentifiseer word. Aangesien bokke hoogs beweeglik is, kan B. melitensis ook wyd versprei word en dit is aansteeklik vir mense en beeste.
Met betrekking tot hondsdolheid het Shepherd gesê dit blyk of te veel boere nie die risiko ernstig opneem om hierdie dodelike siekte op te doen nie. Soogdiere wat algemeen op plase voorkom, insluitend honde, katte, perde, beeste, skape en bokke, is almal vatbaar om hondsdolheid op te doen van wilde diere, soos jakkalse, en van mekaar. Mense wat in aanraking kom met die diere wat hondsdolheid dra, kan dan ook met die hondsdolheidvirus besmet word.
“Sodra die simptome van hondsdolheid by ’n mens begin voorkom, is dit te laat. Daardie mens sal sterf. As jy selfs vermoed dat jy dalk met ’n hondsdol dier in aanraking was, gaan dadelik na jou dokter of naaste staatskliniek vir behandeling. En maak seker dat alle honde en katte op die plaas jaarliks teen hondsdolheid ingeënt word,” het Shepherd gesê.
