“Reeds aan die einde van verlede jaar is die stelling gemaak dat daar gunstige tekens is vir die wolmark vir vanjaar, maar dat wisselvalligheid nog te wagte kan wees,” sê mnr. Deon Saayman oor die rede vir die insinking
Mnr. John Roberts, uitvoerende hoof van Australian Wool Innovation, sê hy is optimisties oor wolpryse danksy bemarkingsukses in Japan en Italië, hernude vraag vanuit Indië en omdat die Chinese ekonomie weer oopgestel is ná die covid-19-pandemie.
“Daar is ’n werklike gevoel dat 2023 beter sal wees as 2022. Ons span in China het ons vertel dat daar ’n hoë vlak van normaliteit is ná die jongste uitbreking van die omicron-stam van covid-19.”
Dit kom voor dat Chinese tekstielmeule weer sedert vroeg Januarie op volle kapasiteit funksioneer.
Goeie tekens
Die gemiddelde gesertifiseerde aanwyser het volgens Saayman in die eerste vyf veilings van 2023 met 24,4% gestyg, maar het op die daaropvolgende veilings tot op 1 Maart met 4,7% gedaal. Die prys van gesertifiseerde wol is dus steeds net minder as 20% hoër as teen einde 2022. Volgens Saayman is Suid-Afrikaanse veilingsvolumes vir vanjaar merkbaar meer as die ooreenstemmende tyd in 2022.
Luidens Cape Wools se jongste veilingsgverslag vir 1 Maart het die pryse van die nie-sertifiseerde wol met 2,8% gedaal tot R174,88 per kg, met die aanwyser vir gesertifiseerde wol wat met 2,1% gedaal het tot R187,28 per kg teenoor die vorige veiling. Afwaartse druk in die mark, asook ’n versterking in die rand word aangevoer as die rede vir die daling.
“Die aanbod het hoofsaaklik bestaan uit goeie gehalte wol, met 65% van die aanbod wat 20 mikron of fyner getoets het, en 63% van die Merinowol wat gesertifiseerde volhoubaar geproduseerde wol was.”
Op die ooreenstemmende Australiese veiling op 23 Februarie het pryse effens gedaal in Australiese dollarwaarde.
Suid-Afrika volg tradisioneel die Australiese mark, en volgens Saayman lei gesertifiseerde wol daartoe dat Suid-Afrikaanse wol met tye beter presteer as die Australiese mark.
“Ons het wel taamlike uitskieters vanjaar gesien in die 18-20 mikronsegment weens die styging in pryse op die eerste vyf veilings.”
In Australië is daar vanjaar groot volumes op veilings, wat druk op kopers se kontantvloei plaas en ook lei tot logistieke probleme wat die mark belemmer het.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
