Dit is geskryf deur die wetenskaplike dr. Johan Fourie, wat jare lank verantwoordelik was vir dekgewasproewe by die LNR Infruitec-Nietvoorbij-navorsingsentrum op Stellenbosch.
Die boek, Cover Crops in South African Vineyards, vorm deel van ’n reeks wat deur Winetech, die Suid-Afrikaanse tafeldruifbedryf (Sati) en Villa gefinansier word in ’n poging om kennis en tegnologie aan die wingerdbedryf oor te dra.
“Navorsing oor dekgewasse en bewerking het vroeg in die 1970’s begin deur die jong manne van destyds, Dawid Saayman, Leopoldt van Huyssteen en Johan van Zyl. Die navorsing het egter eers werklik aan die gang gekom in die middel 1980’s, toe Johan Fourie by die span aangesluit het as ’n jong navorser vars uit die universiteit,” het mnr. Kobus Louw van Sapex tydens die bekendstelling van die boek in die Paarl gesê.
Die navorsing het uiteindelik meer as ’n dekade geduur.
“Johan het katedrale gebou met sy navorsing. Vir hom is dit die groter prentjie wat tel. Johan het die basis gelê vir al die werk oor dekgewasse wat deesdae gedoen word. Dié boek sal nog lank gebruik word as verwysingstuk,” meen Louw.
Die gids bespreek die voordele van dekgewasse en die keuse en vestiging van dekgewasse in verskillende gebiede. Dit bestudeer ook die invloed van dekgewasse op grondkoolstof en minerale, asook op wingerdvoeding en -prestasie. Siekte en plae word bespreek voor die boek met ’n hoofstuk vol praktiese riglyne afsluit.
Cover Crops in South African Vineyards is gratis beskikbaar by Winetech, Sati en Villa.
