Die
Beauvais-aanleg in Frankryk het onlangs die vervaardiging van die miljoenste
trekker van AGCO se Massey Ferguson-handelsmerk gevier. Dié aanleg het op 20
November 1960 begin om Massey Ferguson-trekkers te vervaardig.
Die Massey Ferguson-handelsmerk vier terselfdertyd sy 175ste bestaansjaar.
Volgens mnr. Boussad Bouaouli, visepresident van vervaardiging by die Beauvais-aanleg, was die eerste trekker wat in 1960 daar vervaardig is, ’n MF 825-model. Ander vervaardigingsmylpale by hierdie aanleg sluit in die MF 3000-reeks in 1986, wat die eerste trekker was met elektronika aan boord; die MF 8600-reeks in 2008, wat die eerste was wat selektiewe katalitiese reduksie-tegnologie bevat het vir doeltreffende kraglewering en minder skadelike vrystellings; en die MF 8S-reeks in 2020, en wat die internasionale Trekker van die Jaar-toekenning in 2021 ontvang het.
“Terwyl ons hierdie miljoenste trekker oorhandig, is ons gereed om ons terreine in ’n enkele MF-kampus te verenig met al ons departemente onder een dak. Dit bied hoë buigsaamheid en benut die unieke ervaring, vaardighede en toewyding van die mense wat hier werk. Hierdie trekkermylpaal is ons 2 500 werknemers se sukses, insluitend ons gesamentlike onderneming GIMA Transmission Technology,” het Lhotte gesê.
AGCO se Gleaner-handelsmerk van selfaangedrewe stropers, wat in Noord-Amerika bemark word, vier sy 100ste bestaansjaar. Dit val saam met die opening van verkope van die 2023-modeljaar.
Die broers Curtis, Edwin en Ernest Baldwin in 1923 die eerste Gleaner-stroper vir hul en ander boerderybedrywighede in Kansas in Amerika ontwikkel het. Oor die eeu sedertdien het die Gleaner-handelsmerk voortdurend ontwikkel tot ’n reeks hoëtegnologiestropers.
Hoogtepunte van die Gleaner-handelsmerk se ontwikkelingsgang oor die afgelope 100 jaar sluit die Natural Flow- transversale rotorstelsel vir gladder materiaalvloei en verstoppings in hoëvog- en groenstamtoestande uit te skakel; die eerste 12-ry-mieliestroperkop; en die eerste drapeerkopstuk met ’n ten volle buigbare snybalk, naamlik die DynaFlex.
“Deur daarop te konsentreer om stropers te ontwerp om by die boer te pas, oortref Gleaner ander stropers ten opsigte van gebruiksgemak, bedryfskennis en betroubaarheid. Terwyl ons ons 100ste bestaansjaar vier, gaan ons voort om na die toekoms van landbou te kyk en hou ons visier daarop gerig om stropers te ontwerp wat in die behoeftes van môre se boer voorsien,” het mnr. Matt LeCroy, AGCO se bemarkingsdirekteur vir hooi en voer in Noord-Amerika, gesê.
