Eskom beplan om in die opwekking van elektrisiteit uit hernieubare bronne van energie te belê deur 'n kommersiële "windplaas" langs die Kaapse Weskus op te rig.
Eskom Holdings Bpk. ondersoek die oprigting van 100 windturbines op 'n oppervlak van sowat 25 km² naby Koekenaap. Luidens 'n inligtingstuk wat Savannah Environmental en Sustainable Futures ZA op die internet gepubliseer het, is die mees geskikte terrein drie dele van die plase Gravewaterkop 158, en Olifantsrivier Nedersetting.
Elke windturbine bestaan uit 'n rotor met drie lemme op 'n staaltoring. Die toring is sowat 90 m hoog en elke lem is 40 tot 45 m lank. Windturbines begin reeds by 'n windspoed van 4 meter per sekonde elektrisiteit opwek. Volkragvermoë word teen 'n windspoed van 15 meter per sekonde bereik. Die turbines is ontwerp om "aanhoudend, onbeman en sonder hoë instandhoudingskoste" vir 20 jaar of meer as 120 000 uur te funksioneer.
Volgens mnr. Morore Mashao van Eskom word sowat 200 kW elektrisiteit opgewek by 'n windspoed van 6 meter per sekonde. Teen 'n windspoed van 10 meter per sekonde is dit rondom 1 200 kW en by volle kapasiteit kan 2 000 kW opgewek word. Mashao sê daar word verwag dat die turbines by Koekenaap vir sowat 26% van die jaar gaan werk.
Eskom is reeds 'n geruime tyd besig om windkrag te ondersoek en het in Februarie 2003 'n demonstrasie-windplaas by Klipheuwel opgerig om te bepaal hoe bestaande tegnologie aard in Suid-Afrikaanse klimaatstoestande.
Volgens die inligtingstuk sal dit 'n "vaardige tegniese span" sowat twee jaar neem om die "windplaas" op te rig en in werking te stel.
Die volgende stap in die proses is om die windplaas se impak op die omgewing te evalueer. Die proses is daarop gemik om enige uitwerking wat die oprigting en bedryf van die windturbines op die fisiese en maatskaplike omgewing kan hê, te ondersoek. Belanghebbende persone kry inspraak in die proses en is geregtig om terugvoering op hul vrae te kry. 'n Openbare vergadering oor dié aangeleentheid word op Donderdag, 24 Januarie, om 18:00 by die Lutzville sport- en rugbyklub gehou.
Persone wat meer inligting oor die windplaas verlang, kan mnr. Shawn Johnston by 083 325 9965 of windfarms@mweb.co.za kontak of die inligtingstuk op die webwerf www.savannahSA.com lees.
22 Januarie 2008
