Toegang tot finansiering en die bekostigbaarheid daarvan is dikwels die grootste probleem vir boere wat John Deere-trekkers en -toerusting wil aanskaf, sê mnr. Jacques Taylor, besturende direkteur van John Deere Financial vir Afrika suid van die Sahara. “By John Deere Financial probeer ons om ’n baie mededingende rentekoers vir ons kliënte te beding en werk ons saam met toonaangewende banke om finansiering moontlik te maak."
“Ons is daar om boere te ondersteun om in hul boerderye te belê," herinner Taylor. "John Deere Financial finansier slegs nuwe toerusting en trekkers in óf ’n afbetalingsverkoopsooreenkoms óf finansiële bruikhuurooreenkoms. Binne hierdie raamwerk skep ons ’n buigbare finansieringsplan wat die kliënt se kontantvloeisituasie in ag neem. Daarvolgens kan ons die beste terugbetaalvoorwaardes en die leningstermyn bepaal. Die koste van finansiering hang af van die struktuur van die lening. Die termyn en deposito het ’n regstreekse invloed op die rentekoers. Die rentekoers is byvoorbeeld gunstiger wanneer ’n lening oor ’n korter tydperk terugbetaal word."
Buite die landsgrense
“Danksy ons samewerking met banke, soos Absa in Suid-Afrika en die Standard Bank-groep, kan ons kliënte wat in Afrika wil uitbrei, buite die landsgrense met finansiering help. John Deere het ’n wye teenwoordigheid in Afrika met jare se ondervinding rakende die besigheidsomstandighede,” sê Taylor.
“Ons verstaan die uitdagings en dinamika van die markte in Afrika. Omdat ons die waardeketting in die landbou verstaan, weet ons watter risiko’s in verskillende lande bestaan, nes ons markrisiko’s in Suid-Afrika verstaan. Die hulp wat ons by John Deere Financial aanbied, strek dus veel wyer as bloot net finansiering.”
John Deere Financial is reeds nege jaar in Suid-Afrika gevestig en sy teenwoordigheid in die res van Afrika wat in die afgelope anderhalwe jaar aansienlik verstewig het, maak dit moontlik om boere met belange elders op die vasteland te help met finansiering. Saam met produkte van ’n goeie gehalte, uitstekende naverkoopdiens en die beskikbaarheid van onderdele is dit moeilik om ’n beter aanbieding in die mark te kry.
“Ons het ’n stewige, betroubare posisie in Afrika, veral in Namibië, Botswana, Swaziland, Zambië, Kenia, Tanzanië, Nigerië en Uganda waar John Deere Financial ’n baie mededingende aanbieding het. John Deere Financial kan ook finansiering in verskillende geldeenhede aanbied.”
Hoe, waar en wie
Daar is 63 John Deere-handelstakke in Suid-Afrika en 45 elders in Afrika. Aan elkeen is ’n John Deere Financial-bemarker gekoppel. Dit is dus maklik om by enige geakkrediteerde John Deere-handelaar inligting rakende finansieringsopsies te kry.
Volgens Taylor kan boere egter ook kies of hulle eerder regstreeks by enige van die banke met wie John Deere saamwerk, om finansiering wil aansoek doen. Meer inligting kan regstreeks by John Deere Financial verkry word of boere kan met enige van die konsultante by die Nampo-stalletjie gesels oor finansieringsopsies.
“John Deere is ’n leefstyl en ons wil ’n omvattende aanbod aan ons kliënte bied,” sê Taylor. “Finansiering stel die kliënt in staat om net die beste produkte moeitevry in die hande te kry. Gevestigde produkte en tegnologie vergelyk uitstekend met die prys van ander handelsmerke in die bedryf. Nuwe, eksklusiewe tegnologie het wel ’n prys, maar die voordele wat dit die boer bied, maak die prys wat hy betaal, gou op. Ons verstaan die uitdagings van die boer en het daarom finansieringstrukture wat stabiliteit vir die boer bring.”
As jy dus weer oor ’n John Deere-trekker op jou plaas droom, kan jy weet dat die wens “Ek wil ene hê” nou soveel makliker kan verander in “Ek kán ’n John Deere bekostig!”
Navrae: vir nog inligting oor die opsies wat John Deere Financial bied, kontak jou naaste John Deere-handelaar, bel 011 4372600of besoek www.deere.co.za.
