Vraag:
Ek verhuis eeinde Julie vanaf Durban na Roossenekal in Mpumalanga. Ek is 'n pastoor in die voltydse bediening van die AGS. Ek gaan baie plase en plattelandse grondpaaie ry en sal 'n geskikte 4x4 D/kajuit-bakkie benodig vir my werksaamhede. Kan u asb. raad gee watter voertuig die doeltreffendste en ekonomieste sal wees vir my behoefte en waar ek die beste transaksie kan bekom? Die voertuig sal hoofsaaklik aangewend word vir die vervoer van mense en ligte items oor ruwe terrein. Dankie. - Cobus Jansen (jansenjc@telkomsa.net)
Antwoord:
Daar is ongelukkig nie 'n eenvoudige antwoord op jy vrae nie.
Die eerste saak om 100% seker van te maak, is of jy wèl 'n 4X4-voertuig gaan nodig hê. Onthou, al gebruik jy só 'n voertuig meestal in 4X2 is daar heelwat bykomende massa (oordraratkas + ewenaar + dryfasse) wat die voertuigmassa, èn dan uiteraard die brandstofverbruik, aansienlik verhoog. Benewens die hoër brandstofverbruik van 'n 4X4-voertuig is dit ook duurder om te onderhou as 'n 4X2-voertuig (olie, kruiskoppelings, wielnawe, ens.).
Miskien is die terrein waar jy gaan werk nie heeltemal só veeleisend nie en kan 'n 4X2-voertuig met 'n hoë grondvryhoogte en 'n ewenaargrendel in jou behoeftes vervul.
Oor 'n spesifieke handelsmerk en model kan ek my nie uitlaat nie. Baie mense glo dat 'n bakkie met 'n dieselenjin meer ekonomies is om te bedryf, maar met die huidige brandstofpryssituasie is ek nie heeltemal só seker daarvan nie. Ek sou egter in hierdie stadium eerder een van die meer gevestigde Japanse fabrikate verkies bo die Chinese voertuie al bied laasgenoemde 'n redelike prysvoordeel. Na verneem word, ervaar die Chinese produkte nog redelik tandekry-probleme en is hulle handelaarsnetwerk (met beskikare diens/onderdele) ook nog nie só goed uitgebrei as dé van die Japanse handelsname nie. Die beste sal waarskynlik wees as jy 'n CAR-tydskrif in die hande kry en uit hulle omvangryke tabelle vir jou 'n vergelykende (kort)lys saamstel wat prys, krag/wringkraglewering, brandstofindeks weerspieël.
In jou uiteindelik keuse behoort jy in gedagte te hou watter vervaardigers wel handelaarskappe op Roossenekal of die omliggende dorpe bedryf. Dit sal immers die onderhoud en beskikbaarheid van onderdele makliker maak.
21 Julie 2008
