Goeie verkope van landboumasjinerie in Desember toon 'n sterk vraag, ondanks die laat somerreën wat in sekere gebiede geval het, sê mnr. Charles van Niekerk, vise-voorsitter van die SA Landboumasjinerie-assosiasie.
Trekkerverkope van 332 eenhede in Desember was bykans 31 % hoër as die 254 eenhede wat die vorige Desember verkoop is. Trekkerverkope in 2004 was 22 % hoër vergeleke met verkope in 2003.
Stroperverkope bly goed: Verkope was byna 48 % hoër as in die ooreenstemmende tyd die vorige jaar. Balerverkope het ook goed vertoon en verkope was 67 % hoër as verlede jaar.
Die fundamentele aspekte wat die verkope van landboumasjinerie in 2004 beïnvloed het, bly goed. Produksievlakke vir gewasse was redelik hoog, rentekoerse het gedaal en pryse vir toerusting het steeds afgeneem, hoewel dit teen laer vlakke afgeneem het as in die vorige twaalf maande.
In die heersende kopersmark het boere die geleentheid benut om verouderende toerusting met nuwe toerusting te vervang. Ten spyte van die laat somerreën, dui ramings van die Oesskattingskomitee daarop dat 15 % meer mielies dié seisoen geplant kan word.
Die volgehoue sterk rand en hoë vlakke van voorraad wat oorgedra word, veral van mielies, het daartoe gelei dat produsentepryse oor die afgelope paar maande skerp gedaal het. Dit kan daartoe lei dat verkope afplat. Aanvanklike ramings vir trekkerverkope in 2005 is ongeveer 4 000 eenhede.
13 Januarie 2005
