Soos enige boer sal weet, is dit nie 'n maklike taak om 'n buiteband met 'n bandligter van 'n velling af te haal nie. In baie gevalle is dit weens afstand ook nie prakties om dorp toe te ry om dit te láát doen nie.
Moeg gesukkel op buitebande van vellings af te haal, het mnr. Tiaan du Plessis van die plaas Wagnou in die distrik Gobabis, Namibië, besluit om sy eie druktoestel te bou om buitebande mee af te haal. Dit kan boonop vir ander perswerk gebruik word.
Hy het 'n ou velling van 'n vragmotor as basis vir die toestel gebruik. Aan die basis het hy 'n gedeelte van 'n ou ewenaar, met die kant-as daaraan, vasgesit. In die bokant van die kant-as het hy 'n metaalbasis met 'n gat met skroefdraad daarin vasgesweis sodat die oorspronklike wiellaer en wieldrom steeds daarop kan draai.
Du Plessis het 'n lang bout in die metaalbasis in die kant-as ingedraai. Hy het 'n ronde plaat met twee handvatsels van ronde ysterstafies gemaak. Die plaat pas om die staalbout en word gebruik om die buiteband teen die wieldrom vas te draai.
Die raamwerk van die pers bestaan uit twee horisontale en een vertikale spoorstaaf wat reghoekig aanmekaar gesweis is. Die hoeke is met hoekyster versterk. Die onderste, horisontale staaf is aan die wieldrom vas.
Hy het 'n kanaalagtige stukkie yster ontwerp en vasgesit bo-op 'n domkrag met 'n vermoë van 15 ton. Dié yster skuif netjies oor die onderste deel van die boonste spoorstaaf om seker te maak dat die domkrag nie uitval nie.
Aan die sykant van die domkrag het hy 'n stukkie vierkantpyp gesweis. Dit het twee gate van 6 mm in die middel sodat 'n pen daardeur gedruk kan word. 'n Soliede vierkantige ysterstaaf, waarin gate geboor is, pas binne-in die vierkantpyp. Aan die onderkant van die ysterstaaf het hy 'n stukkie van 'n wielring vasgesweis. Daarmee word die band van die velling afgedruk. Die doel met die gate in die ysterstaaf is om dit op of af te skuif na gelang van die grootte van die band.
Vir ander perswerk het Du Plessis perskoppe van verskillende groottes gemaak uit pyp wat hy aan die een kant toegesweis het.
Aan die ander kant van elke kop is 'n metaalbasis met 'n gat met skroefdraad daarin. Die kop draai in die skroefdraadgedeelte van 'n bout in wat hy aan die onderkant van die domkrag vasgesweis het.
3 Desember 2004
