Toe hy nog self geboer het, was voer- en waterkrippe van sement vir mnr. Johan Vorster van Fauresmith te swaar en lomp om te vervoer, terwyl staalkrippe soms roes as hy lekke met sout daarin aan sy skape gevoer het.
Ander boere wat hy ken, het soortgelyke klagtes gehad. Selfs sommige rubberkrippe het probleme opgelewer, want lasplekke het losgetrek as 'n skaap of bees in die krip trap.
Vorster het toe, soos dit 'n boer in nood betaam, 'n plan gemaak en krippe van uitgediende rubbervervoerbande gebou.
Vandag boer hy nie meer nie, maar het dit sy nering gemaak om krippe van rubber te vervaardig en aan boere te verkoop.
Sementkrippe is baie sterk en dit hou lank, maar die slag as só 'n krip verskuif moet word, moet die boer 'n klomp werkers nader roep om te help. Aan die ander kant is staalkrippe ligter, maar die sout in 'n skaap- of beeslek laat die staal mettertyd roes. Daarvan getuig die hope uitgediende staalkrippe op menige skaap- en beesplaas.
Daar is wel rubberkrippe beskikbaar, maar dié waarmee Vorster te doen gehad het,word op die punte gelas om dit 'n vierkantige hoek te gee. As 'n skaap of bees per ongeluk in hierdie krip trap, kan die lasplek losskeur.
Vorster het daardie probleem gefnuik deur die punt nie te las nie, maar dit met behulp van 'n dwarsyster, pen met 'n gaatjie en spy in 'n regop posisie te hou. Dit maak die skoonmaak van die krip ook makliker, want die spy word bloot uitgetrek omdie rubberstrook te laat sak en dan loop die vuil water uit. Nadat die krip gewas is, word die los punt weer na bo gevou en met die pen en spy vasgemaak.
Hy het ook 'n kleiner krip gebou wat veral nuttig op skoue is, waar die skape in klein hokkies staan. As hul water- en voerkrippe op die grond is, trap en mis die skape daarin. Vorster se krip haak aan die tralies en is dus buite bereik van die skape se pote.
Selfvoerders - ook alles van rubber - het ook die lig in Vorster se werkswinkel gesien. Dit is bestand teen wind en weer en is lig genoeg om maklik agter op 'n bakkie gelaai te word.
- Navrae: Mnr. Johan of mev. Lida Vorster, sel 082 375 2296 of 082 972 5114; e-pos waterpuntbk@telkomsa.net.
Landbouweekblad, 28 Maart 2008
