Die hantering van ronde voerbale, wat gewoonlik 'n taak vir meer as een mens is, is maklik met 'n eenvoudige en ligte waentjie. Een mens laai 'n baal op en af.
Die hantering van ronde bale is op talle plase 'n kopseer. Spesiale toerusting is daarvoor nodig, soos 'n trekkergemonteerde laaivurk.
Maar met sy wa wat spesiaal daarvoor ontwerp is, haal hy ál die gesukkel uit dié werk, sê mnr. Hannes de Beer van die plaas Welgevoed, Senekal.
Hy sê omdat heelwat grassoorte op sy plaas voorkom, het hy daarvan gebaal en op kaal kolle in die veld oopgerol. Wanneer die beeste dit vreet, trap hulle dit los en fyn, die saad beland in die grond en gras groei op die kaal kolle.
Ronde bale is moeilik om te hanteer en omdat hy so baie daarmee moet werk, het De Beer die wa ontwerp. Die wa, waarmee een baal vervoer kan word, word agteruit tot teen die baal gestoot en agteroor gekantel. Een mens kan die baal tot op die wa rol en die wa word dan sonder veel inspanning aan sy disselboom op sy wiele getrek.
Die wa met die baal is lig en beweeglik genoeg sodat dit met gemak deur een mens gestoot of getrek kan word. Daarby kan dit aan 'n bakkie gehaak word. De Beer het gevind dat dit heelwat vinniger en goedkoper is om die wa met 'n bakkie te sleep as met 'n trekker. Die wa kan selfs deur 'n perd getrek word.
Omdat die wa so klein en kompak is, is dit maklik om in klein ruimtes, soos 'n skuur of kraal, te gebruik. Dit is veral nuttig op 'n veeplaas of waar baie koeie gemelk word. Voer kan vinnig na die diere gebring word.
Dit is selfs moontlik om meer as een wa aan mekaar te haak as meer as een baal vervoer moet word.
De Beer sê dit is maklik om vir die wa 'n bak in te sit as dit vir die vervoer van ander goedere nodig is.
Hy bereken dat hy die wa vir R3 000 kan bou.
Mense wat meer inligting soek, kan De Beer bel by 082 809 7888, 058 481 2957 of 083 240 4570.
6 Februarie 2004
