Daadwerklike stappe word deur die SA Instituut van Landbou-ingenieurs (SAILI) gedoen om die getal mense in hierdie beroep te verhoog.
Mnr. Neels Bezuidenhout, voorsitter van die instituut, het op hul jaarvergadering op Howick gesê R200 000 is vir studielenings beskikbaar gestel. Aansoekers word baie streng gekeur, met inagneming van hul eerste jaar se punte, landbou-agtergrond, toewyding en toekomstige planne in die beroep.
Geen lenings word vir die eerste jaar toegestaan nie. Vanjaar het een student in sy tweede jaar, een in sy derde jaar en een in sy finale jaar 'n lening gekry. Dit is rentevry vir die tydperk wat die student studeer en word eers terugbetaal (teen 'n rentekoers van prima minus 2%) sodra die student begin werk.
Nogtans is daar steeds 'n dringende behoefte aan meer beurse en lenings sodat potensiële landbou-ingenieurs nie aan ander ingenieursberoepe afgestaan word nie.
Benewens die landbou-ingenieursvakke soos besproeiing, dierebehuising, krag- en produksiewerktuie en prosessering, dek die kursus bykans alle ander aspekte van ingenieurswese, soos siviele, meganiese, elektriese, voedsel- en bedryfsingenieurswese.
Staatsbeurse is wel beperk beskikbaar, maar aangesien daar 'n toenemende tekort aan studente is, het die instituut besluit om self stappe te neem om studente te lok.
Bezuidenhout het op Howick gesê die instituut se ledetal het die afgelope sewe jaar relatief konstant gebly en staan tans op 316 lede. Hulle wil dit graag na 500 verhoog.
2 Oktober 2008
