Volgens die Nasionale Vereniging van Voertuigvervaardigers van Suid-Afrika (NAAMSA)en Associated Motor Holdings (AMH) was verlede jaar se motorverkoopsyfer van 533 327 nuwe eenhede 'n teleurstellende 21,1% laer as 2007 se verkoopsyfers. Die passasiersmotorsegment het die grootste daling, naamlik 24,3% teenoor 2007, gehad.
Mnr. Brand Pretorius, voorsitter van McCarthy Motor Holdings, sê die grootste redes vir hierdie afname in verkope, veral wat passasiersmotors betref, is die lae verbruikersvertroue en duurder voertuie, die hoër rentekoers en laer inruilpryse. Verder het baie strenger uitleenvereistes en die daling van verbruikers se besteebare inkomste weens hoë inflasie en stygende petrolpryse ook 'n ongunstige uitwerking op die vraag na nuwe motors gehad.
Die onderdrukte stand van die voertuigmark in 2008 is verder versterk deur die afname in verkope van ligte sowel as medium handelsvoertuie. 2008 se verkope met 17,1% tot net 169 480 eenhede gedaal. Die afdeling vir medium handelsvoertuie (MHV) het die jaar op 12 143 eenhede afgesluit. Dit is 'n daling van bykans 20% teenoor die vorige jaar. Die afdeling vir swaar handelsvoertuie (SHV) se verkope het met 7,6% tot 6 956 eenhede gedaal.
Pretorius skryf die daling in die algehele handelsvoertuigverkope toe aan die ekonomiese groei wat verlangsaam het, sowel as 'n afname in sakevertroue. Hy voorsien 'n verdere daling van 9,4% in algehele voertuigverkope vir 2009 tot 483 000 eenhede teenoor verlede jaar se syfers.
"Relatief gesproke is die Suid-Afrikaanse motorbedryf in 'n baie beter posisie as dié van die VSA en Europa, en die eerbare spelers sal waarskynlik oorleef," het Pretorius bygevoeg.
13 Januarie 2009
