Hierdie inlynskeurploeg van Erdvark by Vredendal is ook ’n gastoediener vir minimumbewerking. Dit maak die grond 250-300 mm diep los (inlasfoto), blaas stikstof in gasvorm (ammoniak) by die grond in en verseël dit weer. Dit is vir onder meer mielies en sojabone voordat die saad gesaai word en vir suikerriet waar die gas tussen die rye plante toegedien word nadat die oes afgekap is. Prys: R1,155 miljoen. Navrae: Mnr. Piet Jacobs, 082 920 9346.
Van Zyl Staalwerke van Reitz se windryroller word gebruik om saailinge teen winderosie te beskerm deur die boonste grondlaag tussen die rye plantjies met ses stelle dubbelspane en vier stelle enkelspane te versteur. Dit is vir mielies, sojabone en sonneblomme ontwerp. Die model op die foto het ses rye van 76 cm. Prys: R172 500. Navrae: 058 863 2452.
Hierdie hoëspoed-skottelploeg wat deur Orbach bemark word, is geskik vir die saai van dekgewasse en kan teen 8-16 km/h werk. ’n Pluspunt is die onderhoudsvrye koeëllaers. Die model op die foto bewerk 6 m op ’n slag. Die saadkas is van Lehner Vento en die skottelploeg is van Metal. Prys: R816 500. Navrae: Mnr. Erik Rautenbach, 082 445 3931.
Agripieces van Benoni se beste verkoper is hierdie 3-in-1-werktuig. Dit doen tegelykertyd ’n primêre, sekondêre en tersiêre bewerking deur die grond met skottels en tande los te maak, met oesreste te vermeng en die saadbedding met ’n roller gelyk te maak. Prys: R1,834 miljoen. Navrae: Mnre. Speedy Jooste, 083 633 6968, of Wimpie du Preez, 073 102 2287.
Agri Afrika se nuwe veeldoelige, vertikale Great Plains Terra-Max25-grondbewerker het skottels wat effens konkaaf is en ’n snyhoek wat met 8 grade verstel kan word om oesreste beter stukkend te sny en die grond te bewerk. Sy werkwydte is 7,6 m. Voor is twee stelle snyskottels, gevolg deur ’n getande roller wat die kluite stukkend breek, plantreste oplig en weer neersit, en agter is twee stelle rollers wat die grond effens vasdruk om ’n goeie saadbedding te maak. Prys na gelang van die wisselkoers. Navrae: Mnr. Marius Tolmay, 083 581 5709.
Hierdie Tatu GASPCR-skottelwerktuig wat deur Valtrac vanaf Brasilië ingevoer word, het twaalf groot skottels van 0,914 m in deursnit en 12 mm dik. Die gewig van 4,4 ton (336 kg per skottel) maak die bewerking van harde grond moontlik, onder meer om nuwe lande in die veld te maak. Die koeëllaers het ’n waarborg van drie jaar. Me. Bronwyn Cilliers van Valtrac is by die werktuig. Prys op aanvraag weens die wisselende staalprys en wisselkoers. Navrae: Mnr. Attie de Villiers, 083 261 9863.
Erdvark se driedimensionele landskapmaker word gebruik om ’n land gelyk te maak nadat dit met GPS gekarteer en ’n 3D-kaart geteken is. Dan kan die hoë dele weggeskraap en holtes opgevul word. Dit is belangrik om grond betyds gelyk te maak voordat dit dalk baie reën om spoelskade en versuiping te voorkom. Die TBP7000-model vou tot ’n breedte van 2,6 m op wanneer dit vervoer moet word. Prys nie beskikbaar nie. Navrae: Mnr. Piet Jacobs, 082 920 9346.
?½û¿ºÛ?a?Gehl se turbo-aangejaagde 4x4 GBL-X-900-trekkerlaaigraaf is veelsydig en duursaam, en tog is dit maklik vir nuwe gebruikers om te leer ken en te hanteer. Uitstaande kenmerke van die 67 kW-werktuig sluit in slim UC-hidroulika vir beter brandstofdoeltreffendheid, ’n betroubare Carraro-astransmissie, veiligheidslotte vir balk- en swaaiaksies en ’n gerieflike kajuit vir die operateur. Die GBL-X-900 kan toegerus word met verskillende aanhegsels, soos ’n hamer aan die agterkant en bakke vir verskillende gebruike aan die voorkant. Prys: Vanaf R872 850. Navrae: ELB Equipment, 011 306 0700.
