Die vraag na nuwe landbouwerktuie en -toerusting geniet 'n ongekende bloeitydperk en verkoopsyfers bly styg.
Die trekkerverkope van 657 eenhede in Julie is byna 50% hoër as die 443 eenhede wat in Julie verlede jaar verkoop is, sê mnr. Charles Van Niekerk, voorsitter van die SA Landboumasjinerie-assosiasie.
Vir die jaar tot dusver is trekkerverkope byna 53% hoër as vir die ooreenstemmende tydperk verlede jaar. Stroperverkope van 37 eenhede in Julie is meer as dubbel wat dit in Julie verlede jaar was.
Volgens Van Niekerk weerspieël dit die vraag na toerusting om die huidige uitstekende mielie-oes te stroop. Balerverkope is steeds lewendig teen 40% hoër as vir dieselfde tydperk verlede jaar.
Sentiment in die mark bly positief. Die boere wat kon, het van die geleentheid gebruik gemaak om verouderende toerusting te vervang. Baie boere sal egter deeglik besin oor insetkoste wanneer hulle beplan vir die komende somergewasseisoen, voordat hulle besluit wat hulle aan die einde van die jaar wil aanplant. Die laat somer-/herfsreën het sekere boere in staat gestel om die grootste voorbereidingswerk van landerye te vervroeg en dit dra ook steeds daartoe by om verkope van toerusting te stimuleer.
Die vraag na landboutoerusting sal waarskynlik goed bly in die derde kwartaal. Daarna sal verkope afhang van die weer en aanplantvooruitsigte vir somergewasse in die vierde kwartaal.
7 Augustus 2008
