'n Meerdoelige waentjie van sterk metaalplaat is geskik vir 'n wye reeks take: Van vervoerwerk tot ploeg en skoffel en die regmaak van paaie.
Mnr. Judge van Heerden boer op die plaas Zwarte Jongensfontein in die omgewing van Blombos, Stilbaai, met dekriet. Toe hy 'n ligte werktuig, waarmee hy allerlei take kon uitvoer, nodig gehad het, het hy ná 'n bietjie dinkwerk en beplanning sy eie geprakseer.
Die werktuig word aan die trekker se driepuntstelsel gemonteer en kan binne drie minute aan- of afgehaak word. Van Heerden sê hy haak dit egter byna nooit af nie omdat dit so baie gebruik word.
Die wa het in die middel agter 'n wiel wat afgehaal kan word deur slegs 'n pen uit te trek. Die wiel word teruggesit wanneer 'n redelike vrag oor 'n langerige afstand vervoer moet word.
Wanneer sand of mis opgelaai moet word, word die wiel afgehaal. Deur agteruit te ry, word 'n vrag van tot een kubieke meter binne 'n paar sekondes opgeskep. Die trekkerbestuurder beheer die hoogte van die bak deur die driepunt. 'n Skraper met 'n hidrouliese silinder stoot die vrag binne sekondes af.
Dit duur slegs 'n paar minute om 'n padskraperlem met vier boute van gegalvaniseerde staal onderaan die werktuig vas te bout. Die effense hoek waarteen dit gemonteer word, skraap die grond na die kant. Die trekkerbestuurder kan die skraapdiepte van die lem met die driepunt beheer. Die lem kan ook grond gelyk maak.
Om slote te maak vir die plant van dekriet monteer Van Heerden ploeg- of skoffelskare onderaan die werktuig.
16 Julie 2004
