Vanjaar is pryse van R160 000 op die spel in Savtek, die Suid-Afrikaanse Federasie van Veteraantrekker-en-enjinklubs, se Engen-enjinrestoureerkompetisie.
Deelnemers en mentors wat enjins van ouer as 30 jaar restoureer, kan tot 15 Februarie vanjaar in vier kategorieë inskryf. In die afdeling vir kompakte enjins kan juniors (18 jaar en jonger) inskryf, en die eerste drie plekke word met onderskeidelik R15 000, R10 000 en R5 000 beloon. Vir standaardenjins kan die juniors met R20 000 (eerste plek), R10 000 (tweede plek) en R5 000 (derde plek) wegstap.
Dieselfde wenbedrae is op die spel vir standaardenjins vir seniors (19 tot 30 jaar). Meesters wat standaardenjins inskryf, kan onderskeidelik R30 000, R20 000 en R10 000 vir die topinskrywings ontvang.
Skole kan twee tot vyf leerders in die beginnerklas inskryf, en alle inskrywings is gratis.
Die kompetisie is drieledig. Eerstens moet ’n enjin van 30 jaar of ouer so na as moontlik aan die oorspronklike gerestoureer word. Van deelnemers word ook vereis om ’n werkboek met foto’s van die proses te maak, en op die dag van die beoordeling moet elk ’n mondelinge verslag oor die proses gee en die enjin kan beskryf.
Die beste twee deelnemers van die Savtek-streek dring deur na die eindronde in September vanjaar in Bloemfontein.
Deelnemers hoef nie uit klubgeledere te kom nie. Savtek-klublede reël die uitdunne in die streke, en sal ook as mentors optree waar nodig.
Navrae: Mnr. Christo Pieterse, 082 416 9020; e-pos: engenerc123@gmail.com (en kry ’n volledige brosjure); web: www.savtec.co.za en klik op EERC.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
