Die grootte van die plaaslike trekkervloot (die aantal trekkers in Suid-Afrika jonger as 20 jaar) het die afgelope twee jaar merkbaar verhoog nadat dit die afgelope vier jaar redelik stabiel was.
Dr. Jim Rankin van Agfacts skryf in die Februarie-uitgawe van die Agfacts-nuusbrief die grootte van die totale trekkervloot in Suid-Afrika was verlede jaar 67 669 trekkers. Dit is merkbaar meer as die 62 400 tot 63 500 van die afgelope vier jaar.
Die 67 669 eenhede van 2008 is sowat 40% van die grootte van die trekkervloot van 169 700 eenhede in 1988, twee dekades gelede.
Volgens Rankin was die grootte van die trekkervloot 15 jaar gelede (1993) sowat 121 000 eenhede.
Sowat 42 100 eenhede is nou tien jaar en jonger, maar steek af teen die 91 700 eenhede van twee dekades gelede. Die laagste vlak wat trekkers in dié ouderdomsgroep behaal het, was die 35 600 eenhede van 2001.
Rankin sê die verhouding van eenhede in die vloot wat jonger as 10 jaar is, het van 54% in 1988 gedaal tot 35,8% in 1993, maar daarna mooi toegeneem tot 62% verlede jaar.
Die goeie nuus is dat die aantal eenhede wat jonger as vyf jaar is (27 300 in 2008) sowat 40% van die trekkervloot uitmaak. Dit is die hoogste persentasie die afgelope 20 jaar.
Rankin sê die grootte van die trekkerwerf het gestabiliseer en die afgelope jare toegeneem. Om die grootte van dié werf te volhou, sal 4 000 tot 5 000 nuwe eenhede per jaar verkopp moet word.
10 Februarie 2009
