Die projek sal deur die landboudienstemaatskappy FarmSol Holdings bestuur word.
In ’n verklaring verduidelik SAB dat dié moderne trekkers en werktuie teen “bekostigbare tariewe” aan hierdie boere verhuur word. Die boere is terselfdertyd opgelei en vaardig om hierdie tegnologieë te gebruik om hul produktiwiteit, winsgewendheid en volhoubaarheid te verbeter.
Me. Zoleka Lisa, SAB se visepresident van korporatiewe aangeleenthede, sê hierdie projek bou voort op SAB se samewerking met FarmSol sedert 2016. Tot dusver het SAB rentevrye lenings aan ontwikkelende boere onder FarmSol se toesig verskaf om hierdie boere in staat te stel om gewasse soos gars en konvensionele geelmielies te verbou. SAB koop die graan.
“Dalende opbrengste is ’n groot rede vir die groeiende aantal sukkelende kleinboere in Afrika. Daarby maak die hoë koste van landboumasjinerie, saam met min geleenthede vir finansiering, toegang tot boerderymeganisasie met die nuutste tegnologie ’n vergesogte droom vir baie nuwe swart boere.”
Luidens die verklaring sal gekeurde boere in Noordwes nou ook sojabone, sonneblomme, koring, kanola en hawer kan verbou. Hierdie gewasse sal hul inkomste diversifiseer, terwyl dit ook voordelige wisselbou met gars en geelmielies bevorder.
Mnr. Desmond Sibinda, een van die begunstigdes, sê die trekkers en werktuie sal hom en ander boere help om betyds te plant, geld te bespaar en te leer hoe om hul eie boerderytoerusting eendag te bestuur en te hanteer.
Mnr. Aron Kole, besturende direkteur van FarmSol, sê die nuutste meganisasie- en presisieboerderytegnologie sal nie net die begunstigde boere regstreeks bevoordeel nie, maar ook bydra tot ontwikkeling en armoedeverligting.
Altesaam 41 ontwikkelende boere van Noordwes, die Vrystaat, KwaZulu-Natal en Mpumalanga neem tans deel aan FarmSol se program. Die program het reeds bygedra tot die skepping van 50 heeltydse en 224 tydelike werksgeleenthede in die betrokke landelike gebiede.
