“Die enigste manier om dit reg te kry is om meer uitsette met minder insette te verkry, en slegs tegnologie kan dit bewerkstellig,” het mnr. Jason Brantley, direkteur van Asië, Afrika en die Midde-Ooste by John Deere op die Africa Agri Tech-konferensie in Pretoria gesê.
Brantley het gesê John Deere het oor die afgelope twee jaar van ’n slimbedryfsmaatskappy in ’n tegnologiemaatskappy verander. Hy bestee jaarliks net minder as $2 miljard aan navorsing en ontwikkeling, met die grootste klem op tegnologie. “Dit is ons visie vir 2030 om die winsgewendste en produktiefste volhoubare produsente moontlik te help skep.”
Mnr. Hentie Breedt, bemarkings-en-kommunikasiebestuurder van John Deere Suid-Afrika, het gesê die maatskappy het drie fokuspunte: produksiestelsels, slimmasjinerie en die ondersteuning van kliënte oor hul hele werksleeftyd.
“Wat die produksiestelsels aanbetref, het John Deere oorgeskakel van die tradisionele manier om trekkers te vervaardig na ’n nuwe benadering om elke stap in die verskillende produksiestelsels te verstaan en daarvolgens masjinerie en tegnologie te ontwerp. Ons gaan kyk dus eers na die behoefte en verskaf dan die oplossing. Hierdie oplossings moet uiteraard nie net vir vandag en môre werkbaar wees nie, maar ook vir toekomstige oplossings.”
Klem op slimmasjinerie
Breedt het gesê die klem op slimmasjinerie is een van John Deere se groter fokuspunte. “Tegnologie is nie daar om mense en hul werk te vervang nie, maar om te doen wat mense nie kan doen nie. Tegnologie soos John Deere se See’nSpray-tegnologie identifiseer en bespuit onkruid binne millisekondes, terwyl dit kontantgewasse ignoreer. Die data wat daarin gaan, is amper ondenkbaar en terwyl een mens met ’n spuit kan loop en onkruid een-een bespuit, is dit nie doeltreffend nie. Tegnologie verrig dus die taak wat mense nie kan doen nie, maar terselfdertyd gaan mense steeds nodig wees om tegnologie te programmeer en te bestuur.”
Die laaste fokuspunt lê daarin om kliënte gedurende hul hele werksleeftyd te ondersteun, het Breedt gesê. “Dus gaan dit nie daaroor om die kliënt net vandag te ondersteun nie, maar om deurentyd ons kliënte die jongste tegnologie en ondersteuning regdeur sy boerdery se leeftyd te gee.”
Dit is ook nie net groter, kommersiële produsente wat hierdie ondersteuning kan verwag nie. “Die eerste oogopslag met tegnologie is die grootste masjinerie, maar ons tegnologie moet reg van intreevlak af relevant tot boere wees,” het Brantley gesê.
Breedt het gesê dat net basiese toerusting reeds ’n groot verskil tot produsente se boerdery maak. “Ons het byvoorbeeld in die Oos-Kaap gesien hoe meganisasie produsente se opbrengste van 1 t/ha mielies na 7 t/ha geneem het. Die langtermynklem is daarop hoe ons produsente kan help om produktiewer en volhoubaar te wees. Dit is ’n kopskuif om te maak, maar ons het die tegnologie. Dit is toeganklik en dit bied verskeie voordele aan ons produsente. Ons praat ook nie van tegnologie wat in die verskiet lê nie, maar wat nou beskikbaar is om ’n verskil in ons kliënte se besighede te maak.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
