Vir Europese trekkers word 'n verhoging van sowat 30 % voorsien en Amerikaanse trekkers gaan waarskynlik met 25% duurder word teen die heersende wisselkoers.
Mnr. Charles van Niekerk, voorsitter van die SA Landboumasjinerie-assosiasie, sê sedert November verlede jaar toe die Euro R9,50 werd was het die rand met tot 35% verswak en toe weer effens herstel tot 'n verswakking van 30%. Terselfdertyd het die waarde van die rand teenoor die dollar met sowat 25% verswak.
Saam met dié verswakking is die meeste Europese vervaardigers verplig om die enjins van hul werktuie verder te verfyn om aan die wetgewing rakende uitlaatgasse te voldoen. Die aanpassings beloop glo tot 10% van 'n trekker se prys en dit word ook nou ingefaseer.
Dit is moeilik om te sê wanneer dié verhoging tot die SA mark gaan deurwerk. Party ondernemings neem vooruitdekking teen sulke gebeurlikhede uit - die wagtyd vir sommige trekkers is tot agt maande.
Maar wat waar is, is dat verskeie verskaffers reeds hul pryse begin verhoog het en dat die verhogings oor die tyd ingefaseer sal moet word om die daling in die ruilwaarde van die rand te absorbeer.
Dr. Jim Rankin van Agfacts sê die verhoogde trekkerverkope van die afgelope tyd kan toegeskryf word aan boere wat die dilemma sien kom het en wat in die posisie was om rats hul trekkervlote aan te vul voor die prysstygings deurgekom het.
Maar hy dink die werktuigverskaffers is net so onkant gevang as die boere. Min mense het die skielike verswakking van die rand verwag en hy glo daar is ook van die ondernemings wat nie vooruitdekking geneem het nie wat nou verplig sal wees om die pryse van hul werktye aansienlik te verhoog.
Sowat 40% van al die trekkermodelle van lede van die assosiasie se pryse is al in Maart aangepas en hy verwag dat nog 50% van die modelle se pryse vandeesmaand verhoog kan word.
Die styging in graanpryse tesame met 'n verwagte goeie oes dra weliswaar daartoe by dat boere die prysskokke beter kan verwerk, maar dit is nie genoeg om dit ten volle te dek nie, meen hy.
27 Maart 2008
