Die verkope van landboumasjinerie in April weerspieël die baie sterk vraag na nuwe toerusting in die bedryf, sê mnr. Charles Van Niekerk, voorsitter van die SA Landboumasjinerie-assosiasie.
Trekkerverkope vir April in die Suid-Afrikaanse mark, sonder uitvoerverkope, was 660 eenhede. Dit is meer as dubbel die 288 eenhede wat verlede April verkoop is. Vir die jaar tot dusver is trekkerverkope byna 68% hoër as verkope vir dieselfde tydperk verlede jaar. Stroperverkope vir die jaar tot dusver is meer as dubbel verkope vir die eerste vier maande verlede jaar. Balerverkope is ook aansienlik hoër as wat dit verlede jaar was.
Volgens Van Niekerk is daar twee belangrike redes vir die huidige sterk vraag na toerusting. Eerstens kon boere op grond van die goeie vooruitsigte vir somergewasse ten opsigte van verwagte produksie en heersende goeie pryse, bekostig om toerusting te koop.
Tweedens het baie boere weens die beduidende gevaar van aansienlike prysverhogings wat volg op die rand wat verswak, besluite oor aankope vervroeg.
Sentiment in die mark is steeds positief en weeg swaarder as die negatiewe aspekte, soos hoër insetkoste en die moontlikheid van rentekoersverhogings. Die mark sal waarskynlik oor die volgende paar maande konsolideer wanneer die invloed van hoër pryse vir toerusting gevoel word, aldus Van Niekerk.
8 Mei 2008
