Trekkerverkope het vir die eerste keer sedert Oktober 1982 die 1 000-merk verbygesteek toe 1 009 eenhede verkoop is.
Dié syfer is effens hoër as die 979 eenhede wat in Oktober 2011 verkoop is. Die bedryf gaan tans van krag tot krag met verkope wat byna 12% hoër is as vir dieselfde tydperk in 2011.
Volgens ’n persverklaring van die Suid-Afrikaanse Landboumasjinerie-assosiasie (SAAMA) was stroperverkope van 34 eenhede heelwat laer as die 45 eenhede wat in Oktober 2011 verkoop is. Stroperverkope is egter in geheel byna 33% hoër as verkope vir die ooreenstemmende tydperk verlede jaar.
Mnr. Callie Human, voorsitter van SAAMA, sê trekkerverkope vir die 2012-kalenderjaar sal tussen 8 000 en 8 800 wees, dus tussen 10% en 20% meer as die 7 400 eenhede wat in 2011 verkoop is.
