Trekkerverkope vir Augustus in die Suid-Afrikaanse mark, sonder uitvoerverkope, was 504 eenhede. Dit is 15% meer as die 437 eenhede wat in Augustus verlede jaar verkoop is. Verkope vir die jaar tot dusver is egter steeds 10% laer as wat dit was vir die eerste agt maande verlede jaar.
Mnr. Chris van Niekerk, voorsitter van die SA Landboumasjinerie-assosiasie, sê stroperverkope vir die maand was hoër as wat dit vir dieselfde maand verlede jaar was, maar is steeds byna 22% laer as vir die ooreenstemmende tydperk verlede jaar. Balerverkope vir die jaar tot dusver is byna 12% laer as verlede jaar.
Oor die algeheel is daar algemene optimisme in die bedryf. Oespryse bly goed en vooruitsigte vir die komende somerplantseisoen lyk ook goed. Boere kyk vanjaar daarna om meer aan te plant, veral mielies en hoop dat lentereën vroeg sal val.
5 September 2007
