Hoër insetkoste en die skadu van hoër rentekoerse het nog nie 'n ongunstige invloed op die plaaslike trekkermark gehad nie.
Mnr. Charles Van Niekerk, voorsitter van die SA Landboumasjinerie-assosiasie, sê verkope van landboumasjinerie in Mei weerspieël die volgehoue sterk vraag na nuwe toerusting in die bedryf.
Trekkerverkope in die Suid-Afrikaanse mark, sonder uitvoerverkope, was 471 eenhede. Dit is meer as 32% meer as die 356 eenhede wat verlede Mei verkoop is. Vir die jaar tot dusver is trekkerverkope byna 60% hoër as vir die ooreenstemmende tydperk verlede jaar.
Stroperverkope is besonder sterk, omdat dié toerusting nodig is om die huidige goeie stand van mielies te oes. Balerverkope was laer in Mei as wat dit verlede Mei was, maar is steeds 50 % hoër vir die jaar tot dusver.
Volgens Van Niekerk is sentiment in die mark steeds positief en dit weeg swaarder as die negatiewe aspekte soos hoër insetkoste en die moontlikheid van hoër rentekoerse. Boere besef dat dit noodsaaklik is om steeds die gewasse wat nodig is vir Suid-Afrika te produseer. Die huidige aankope van landboumasjinerie sal hulle in staat stel om presies dit te doen.
5 Junie 2008
