Trekkerverkope in die Suid-Afrikaanse mark vir Oktober was 766 eenhede. Dit is ongeveer 6% hoër as die 721 eenhede wat in Oktober verlede jaar verkoop is, sê mnr. Charles van Niekerk, voorsitter van die SA Landboumasjinerie-assosiasie, in 'n nuusverklaring.
Trekkerverkope vir die jaar tot dusver is byna 9% laer as vir die eerste tien maande verlede jaar. Stroperverkope vir die maand het skerp gestyg vergeleke met verlede jaar en is nou marginaal laer as verlede jaar vir die jaar tot dusver. Balerverkope vir die jaar tot dusver is ongeveer 9% laer as vir die ooreenstemmende tydperk verlede jaar.
Ná die moeilike beginmaande van die jaar, toe boere met somer- en wintergewasse gely het onder die negatiewe gevolge van die warm, droë einde van die somerreënseisoen, lyk vooruitsigte nou heelwat beter. Die vroeë lentereën sal die grootste deel van die koring-oes dra en het boere wat somergewasse aanplant in staat gestel om te begin met voorbereiding vir die komende seisoen. Aanplanting van somergewasse, veral geelmielies, sal waarskynlik skerp styg vergeleke met verlede jaar. Oespryse het redelik bestendig gebly, ten spyte van die rand wat onlangs verstewig het.
'n Verdere bemoedigende aspek van die mark is dat groter trekkers, wat gewoonlik deur mielieboere aangekoop word, nou goed verkoop. Boere toon ook belangstelling in die aankoop van trekkers vir 2008. Hooimasjinerie behoort in die volgende paar maande goed te verkoop en stroperverkope behoort lewendig te bly weens die goeie oesvooruitsigte.
6 November 2007
