Min dinge weerspieël die uiteenlopende aard van die Suid-Afrikaanse landbou so akkuraat soos die verskeidenheid trekkers wat ’n mens op plase teëkom – van klein, ratse werktuie wat minder as 20 kW opwek, tot indrukwekkende reuse wat meer as 400 kW uitskop, en van splinternuwe, hoëtegnologie-trekkers met gevorderde sagteware tot werkesels wat ewe tuis in ’n museum kon wees.
Die data wat die Suid-Afrikaanse Landboumasjinerievereniging (Salma) en Agfacts sedert die vroeë 1980’s oor trekkers en stropers insamel en oordra, weerspieël ook tot ’n groot mate hoe boerdery in Suid-Afrika oor dekades verander het.
Dr. Jim Rankin, uitvoerende hoof van Agfacts, sê die norm voor 1981 was dat daar jaarliks sowat 15 000 nuwe trekkers in Suid-Afrika verkoop is. Sedertdien het dié syfer gedaal tot die jongste vyfjaargemiddelde van sowat 6 500 trekkers. Drie sleutelfaktore het volgens hom bygedra tot dié afname.
