Trekkerverkope van 424 eenhede in Junie is byna 23% laer as die 553 eenhede wat verlede Junie verkoop is.
Volgens mnr. Leon Pretorius, voorsitter van die SA Landboumasjinerie-assosiasie, is trekkerverkope vanjaar nou 21% laer as wat dit vir die vorige ooreenstemmende tydperk was. Stroperverkope vir Junie is 36% laer as verkope in Junie verlede jaar, maar is steeds marginaal hoër vir die jaar tot dusver.
Twee faktore is verlede maand genoem as aspekte wat verkope beïnvloed. Die eerste is dat banke huiwerig is om aankope van kapitaaltoerusting te finansier en dat potensiële kopers steeds "wag en kyk" voordat hulle toerusting aankoop.
Pretorius sê die situasie is verder vererger omdat die oes van sekere somergewasse vertraag is deur laat reënval. Belangstelling binne die mark bly nietemin goed en dit bly tot ’n groot mate ’n kopersmark. Die meeste maatskappye is gretig om, afhangend van beskikbare voorraad en prysvlakke van spesifieke modelle, transaksies te beding.
7 Julie 2009
