Trekkerverkope van 762 eenhede in Februarie is marginaal (1,7%) laer as die 775 eenhede wat verlede Februarie verkoop is.
Vir die jaar tot dusver is verkope effens hoër as verkope verlede jaar. Stroperverkope van 39 eenhede in Februarie is heelwat meer as die 14 eenhede wat verlede Februarie verkoop is. Vir die jaar tot dusver is stroperverkope byna dubbel dié van verkope verlede jaar, sê mnr. Leon Pretorius,
voorsitter: SA Landboumasjinerie-assosiasie.
Baie van die fundamentele elemente in die landboumasjineriemark is steeds positief. Somergewasse toon goeie potensiaal. Rentekoerse is reeds vanjaar verlaag en vooruitsigte vir verdere verlagings lyk goed. Hoewel oespryse in die afgelope maande gedaal het, behoort beter opbrengste daarvoor te kompenseer.
"Baie boere het van die geleentheid gebruik gemaak om nuwe toerusting aan te koop teen die laer pryse vóór die waardevermindering van die rand laat in 2008. Sodra dié voorraad uitgeput is, sal daar ongetwyfeld 'n aanpassing in die markvooruitsigte vir die res van die jaar wees."
5 Maart 2009
