Afgesien van die huidige resessie wat knyp, lyk dit al asof die wêreld se voertuigvervaardigers oor die volgende vyf jaar groot beleggings sal moet aangaan om aan die internasionale verbruikersvraag na brandstofdoeltreffende èn bekostigbare voertuie te voldoen.
Hoewel loshande die meeste sakelui in die wêreld se voertuigvervaardigingsektor baie onseker is of hulle besighede winsgewend sal wees, dui 'n peiling deur KPMG International aan dat die meeste van hulle glo dat dringende veranderinge aan toekomstige voertuie noodsaaklik is.
In dié peiling, wat in September en Oktober verlede jaar gedoen is, is onderhoude gevoer met 200 hoofde in die voertuigbedryf in Kanada, die Verenigde State van Amerika (VSA), die Verenigde Koninkryk (VK), Frankryk, Duitsland, Swede, Indië, China, Suid-Korea, Japan, Thailand, Brasilië, Mexiko, Spanje, Pole, Slowakye, Rusland, die Tseggiese Republiek, Italië, Switserland, Suid-Afrika en Australië.
Uit dié peiling, wat reeds jaarliks sedert 1999 gedoen word, blyk dit dat slegs 15% van die sakelui verwag dat hul winste vanjaar sal toeneem, 24% verwag 'n daling, terwyl 46% aangedui het dat winste heeltemal té wisselvallig is om 'n voorspelling te waag.
"Dit is 'n duidelike aanwyser dat die motorbedryf 'n krisis ervaar en 85% van sakelui is nie seker dat hulle wél winsgewend sal wees nie. En dit is baie waarskynlik dat die situasie in die eerste paar maande van vanjaar verder kon verswak het," het Gavin Maile, die Afrika-voorsitter van KPMG se voertuig-afdeling gesê.
25 Maart 2009
